كتبت ايمي ابو المجد
يعني إيه تبقى ، انت الليدر ؟
امبارح في المجر كان فيه بطولة العالم للألعاب المائية و في وسط ما السباحة الأمريكية أنيتا الفاريز كانت بتعمل العرض المنفرد الخاص بيها في المسابقة فقدت وعيها و ابتدت تغرق في قاع حمام السباحة ، كان المفروض ان طقم الإنقاذ يقفز في حوض السباحة علشان ينقذوها لكن من المفاجأة اتسمروا في مكانهم ، فبسرعة البرق نطت المدربة بتاعتها بلبسها جوة حوض السباحة علشان تنقذها من الموت.
مفكرتش مقالتش ده مش دوري أنا دوري بينتهي عند القيادة و التدريب ، مفكرتش وجريت على فريق الإنقاذ علشان يقوموا بدورهم ، مقالتش طب ثواني اخلع اللبس الخارجي و انزل مالمايوه ، كل اللي فكرت فيه ديه واحدة من فريقي بتموت وأنا الكابتن أنا القائد أنا الضهر اللي مسئول عن سلامة فريقي وفي ثواني كانت في قاع حوض السباحة ولما ابتدت تخرج من السطح كان فريق الإنقاذ فاق من صدمته وساعدها.
لما تبقى الكابتن (القائد) إتعلم ازاي تبقى ضهر يحمي فريقه من الطعنات مش تبقى إنت اللي بتوجه الطعنات بنفسك ، اتعلم تبقى مصدر أمان لفريقك مش مصدر قلق و تعب ، اتعلم إنك مش في مجال منافسة ضد فريقك لكن انتم بتقودهم وبتساعدهم للإنتصار في المنافسات الخارجية ، اخر حاجة لما تبقى الليدر وتلاقي نفسك تقدر تنقذ حد من تيمك رغم انه مش دورك متتأخرش.