عزة سارى تنقل لكم
كان صعب حد يصدق إنها حقيقة أو إنها ممكن تحصل.
في يناير سنة 2025، في منطقة البدرشين،
بيت في حي شعبي، عايش فيه "عربي"، موظف طالع على المعاش بقاله سبع سنين. البيت بيت عيلة عبارة عن دورين، عايش فيه كمان ابنه إسلام وأخوه سعيد.
في المنطقة كان "عربي" شخص عادي وطبيعي وخدوم، ومعندوش مشاكل مع حد، وكل أمله يجوز ابنه إسلام ويفرح بيه.
لكن اللي مكنش حد حاسس بيه، وعلى مدار 6 سنين، إن البيت كان فيه سر غريب ومخيف.
كان فيه أوضة جوا البيت مقفولة وظلمة... وهناك موجودة فيها بدرية! بنت أخوهم اللي حبسوها في الأوضة، ومحدش يعرف عنها حاجة من سنين!
بدرية كانت مربوطة من رجليها بسلسلة من الحديد، متثبتة بلحام في الحيطة لمدة 6 سنين، والسبب "سوء سلوكها"!!!
القصة اتعرفت لما أم بدرية قدمت بلاغ لرئيس مباحث البدرشين، وقالت له إن بنتها محبوسة في بيت عمها بمساعدة أخوه وابنه، وطلبت مساعدتها عشان تخرج بنتها من البيت ده.
لما راحت قوة من البوليس وفتشوا البيت، لقوا فعلاً أوضة مخفية عن الأنظار ومقفولة بقفل حديد.
قوات الأمن فتحت الأوضة، وهناك كانت المفاجأة... بدرية، اللي عمرها 25 سنة، في حالة يُرثى لها.
البنت كانت في أوضة ضلمة، متسلسلة بالحديد في رجلها اليمين، وريحة الأوضة لا تُحتمل، ومفيش أي ضوء.
بدرية قالت إنها اتعرضت للضرب والإهانة، وإن عمامها، بطلب من أبوها قبل ما يموت، حبسوها في الأوضة دي.
"عربي" قال إنه عمل كده بطلب من أخوه، لأنه مكنش عاجبه سلوك بنته بدرية، اللي اتجوزت وهي صغيرة عندها 19 سنة، واطلقت من جوزها بعد مشاكل كتيرة، واكتشف أبوها إن سبب الطلاق إنها على علاقة بشاب، فطلب من إخواته يساعدوه في حبس بدرية ومتخرجش أبداً منه، لدرجة إنه مات وهما برضه مخرجوهاش!!
لكن بدرية قالت إن أبوها ظلمها، وإنها اطلقت بسبب سوء معاملة زوجها ليها، مش علشان كانت على علاقة بشاب، لكن محدش سمعها أو صدقها.
بدرية لمدة 6 سنين مخرجتش من الأوضة، ومشافتش النور، وكانت بتتعامل معاملة غير آدمية.
أمها مكنتش تعرف هما حبسينها فين، وفضلت 6 سنين تدور عليها وسط القرايب، لأن أبوها ما رضاش يقول لها هو وداها فين!
تم القبض على أعمام بدرية وابن عمها إسلام، وتحرير بدرية من حبسها!