عزه سارى تنقل لكم
يا جماعة، الحكاية النهاردة مفيهاش "هزار" في لقمة العيش.. الدكتور شريف فاروق، وزير التموين، قرر يقطع الشك باليقين ويحط "فرملة" لكل اللي بيفكر يزود مليم واحد على سعر الرغيف السياحي أو الفينو.
الوزير أصدر التوجيه رقم (5) لسنة 2026، والهدف منه واضح وصريح: "المواطن لازم ياكل لقمة نظيفة وبسعر عدل".
إيه الحكاية بالظبط؟ الوزير قال للمخابز السياحية والإفرنجية: "شغلكم على عيني ورأسي، هاتوا الدقيق الـ 72% بتاعكم بمعرفتكم وأخبزوا براحتكم، بس أهم حاجة عندي (الوزن والسعر)".
مفيش حاجة اسمها سعر بمزاج صاحب المخبز، ولا رغيف "خاسس" وميزانه مش مظبوط.
القرار الجديد ألزم كل صاحب مخبز إنه يعلق "يافطة" كبيرة واضحة على الواجهة، مكتوب فيها الوزن والسعر بالمليم، عشان المواطن يبقى عارف هو بيدفع في إيه.. والأسعار بقت كالآتي: الرغيف السياحي (الحر): الـ 80 جرام بـ 2 جنيه (ده السقف بتاعنا)، والـ 60 جرام بـ 1.5 جنيه، والصغنن الـ 40 جرام بـ جنيه واحد بس.
رغيف الفينو (حبيب المدارس): الـ 50 جرام بـ 2 جنيه، والـ 40 جرام بـ 1.5 جنيه، والـ 30 جرام بـ جنيه.
الوزير شدد إن الأوزان دي "خط أحمر"، واللي هيحاول يتلاعب في الميزان أو يزود السعر، القانون مستنيه بمرسوم "سنة 1950" وتعديلاته، يعني غرامات وعقوبات توجع، لأن الموضوع مفيش فيه تهاون.
ومش بس قرار على الورق، ده مديريات التموين في كل المحافظات نزلت الشارع فعلاً، وعيونهم وسط راسهم عشان يراقبوا المخابز ويضمنوا إن كل مواطن بياخد حقه.. والرسالة واضحة لكل أصحاب المخابز: "الانضباط هو سيد الموقف، واللقمة دي حق للشعب".