عزة سارى تنقل لكم
مأساة حقيقية شهدتها مدينة المحلة الكبرى، كشفت عن جانب مظلم وتجرد من كل مشاعر الإنسانية. القصة بدأت بجواز عرفي بين اثنين من "المشردين"، وانتهت بمحاولة بيع طفلهم الرضيع وكأنه بضاعة في سوق!
الحكاية إن فيه ربة منزل اتفقت مع "سمسار" وابنه عشان يشتروا الطفل من أهله أول ما يتولد مقابل مبلغ مالي. وبالفعل فضلت المتهمة تصرف على الأم لحد يوم الولادة، لكن هنا الطمع دخل في الموضوع؛ الأهل طلبوا "نص مليون جنيه" تمن للطفل، ولما المشترية رفضت، السماسرة اقتحموا مكانهم وضربوهم وخطفوا الرضيع بالعافية!
المتهمين لما خافوا والقصة بدأت تتكشف، رموا الطفل في "كرتونة" قدام جامع، والحمد لله ستر ربنا خلى مواطن يلاقيه ويسلمه للأمن اللي جاب حق الصغير في وقت قياسي.
النهاردة، محكمة جنايات طنطا (دائرة الإتجار بالبشر) برئاسة المستشار خالد الشباسي، أصدرت حكمها التاريخي بـ "المؤبد" لـ 5 متهمين وغرامة نص مليون جنيه لكل واحد فيهم. المحكمة في حيثياتها كانت حاسمة وقالت إن الجريمة دي بتهز أركان المجتمع ولازم يكون العقاب رادع لكل اللي بيفكر يتاجر بآلام وأرواح الأبرياء.